Tienertoneelfees

Die Klein Libertasteater bied vanaf 11 tot 15 Augustus 2026 die 19de Tienertoneelfees aan. U dramagroep word hartlik uitgenooi om daaraan deel te neem. Die doel van die fees is om aan leerders optree-geleentheid te bied en die kwaliteit van hul werk te verbeter met die hulp van professionele terugvoer.

Die fees word weer vanjaar in die Drostdy Teater (hoek van Alexander- en Birdstraat, Stellenbosch) aangebied. Kaartjies om na die vertonings te kyk sal by Webtickets beskikbaar wees en beloop R20 (volwassenes) en R10 (leerders, studente & pensionarisse) per vertoning.

Inskrywings sluit op 28 Mei 2026 en die inskrywingsfooie is R400 per produksie. Vul asseblief die korrekte kontakbesonderhede op die vorm in van die persoon wat vir elke groep verantwoordelik is aangesien ons per epos met deelnemers korrespondeer. ’n Rooster rakende optreetye sal teen 4 Junie 2026 aan die regisseurs en kontakpersone van die produksies ge-epos word.

Bestaande of nuutgeskrewe Afrikaanse en Engelse tekste mag opgevoer word, maar slegs nuutgeskrewe Afrikaanse tekste kom in aanmerking vir ’n trofee-toekenning. Die prysuitdeling van die fees se bestes vind op 15 Augustus 2026 plaas na afloop van die laaste vertoning. Die beste produksie van die fees kry die geleentheid om by die 2027 Suidoosterfees op te tree.

U kan die inskrywingsvorm aanlyn invul of aflaai, invul en epos na klt@kleinlibertasteater.co.za.